Zyrtarët talebanë afganë do të marrin pjesë në një konferencë të madhe të Kombeve të Bashkuara për klimën që fillon javën e ardhshme, ka bërë të ditur të dielën ministria e Jashtme afgane.
Kjo do të shënojë herën e parë që ata marrin pjesë që kur ish-kryengritësit morën pushtetin në vitin 2021, raporton Reuters.
Samiti i klimës COP29 në kryeqytetin e Azerbajxhanit Baku do të jetë ndër ngjarjet shumëpalëshe të profilit më të lartë të ndjekur nga zyrtarë të administratës talebane që kur ata morën kontrollin në Kabul, pas 20 vjetësh luftimesh kundër forcave të mbështetura nga NATO.
OKB-ja nuk i ka lejuar talebanët të zënë vendin e Afganistanit në Asamblenë e Përgjithshme dhe qeveria e Afganistanit nuk njihet zyrtarisht nga shtetet anëtare të OKB-së, kryesisht për shkak të kufizimeve të talibanëve në arsimimin e grave dhe lirinë e lëvizjes.
Zëdhënësi i Ministrisë së Jashtme afgane, Abdul Qahar Balkhi, ka thënë se zyrtarë nga Agjencia Kombëtare e Mbrojtjes së Mjedisit kanë mbërritur në Azerbajxhan për të marrë pjesë në konferencën COP.
Zyrtarët talebanë kanë marrë pjesë në takimet e organizuara nga OKB-ja për Afganistanin në Doha dhe ministrat talebanë kanë marrë pjesë në forume në Kinë dhe Azinë Qendrore në dy vjetët e fundit.