Disa infermierë dhe një mjek nga reparti i kirurgjisë në Spitalin e Përgjithshëm të Strugës janë sulmuar në vendin e tyre të punës nga një person i cili ka hyrë me forcë në objekt. Ngjarja ka ndodhur në orën 4 të mëngjesit dy ditë më parë, deklaroi për Alsat mjeku Ilmi Reçi, i cili ishte në krye të detyrës së bashku me tre infermiere të tjera.
Gjithçka filloi pasi në repart kanë mbërritur dy persona.
Njëri ka pasur lëndime të shkaktuara nga shkaqe të panjohura. Teksa prisnin të hynin te doktori, njëri prej tyre ka filluar të sillej dhunshëm. Ka thyer dritaren dhe derën, është futur te mjekët dhe i ka sulmuar.
Rasti është denoncuar në polici. Sulmuesi është arrestuar, por është lënë i lirë të nesërmen. Mjekët thonë nuk ndihen të sigurt në vendin e tyre të punës.
Për shkak të situatave të tilla të padëshiruara që kanë ndodhur edhe më parë, mjekët kujdestarë detyrohen të mbyllin derën e repartit pas orës 23.00. Në spitalin e Strugës nuk ka sigurim fizik gjatë gjithë ditës, andaj policia është përgjegjëse për sigurinë.
“Ndërsa ne thërrasim policinë, kalojnë 10-15 minuta para se të vijnë. Reparti i kirurgjisë tani kishte problem, por shpesh ndodhin gjëra në repartin intern. Vijnë të dehur, të droguar dhe bëhet rrëmujë”.
Në fillim të këtij muaji është sulmuar edhe një punonjës i Shërbimit Emergjent mjekësor në Ohër, ndërsa së fundi në shënjestër kanë qenë edhe dy mjekë në ndihmën e shpejtë të Strugës.