ASH: Përjashtimi i historianëve shqiptarë është skandal institucional dhe fyerje ndaj karakterit multietnik të shtetit
Sherifi: Historia shqiptare po zbehet në mënyrë të qëllimshme – programet mësimore janë të mbushura me pasaktësi dhe përjashtime
Tetovë, 3 korrik – Aleanca për Shqiptarët ka reaguar ashpër ndaj hartimit të programeve të reja mësimore në Maqedoninë e Veriut, duke e cilësuar si “skandal institucional” përjashtimin e historianëve shqiptarë nga grupet punuese.
“Në një shtet që quhet multietnik, përjashtimi i historianëve shqiptarë është jo vetëm një fyerje e drejtpërdrejtë ndaj shqiptarëve, por edhe një veprim që cenon themelin e bashkëjetesës”, deklaroi Isak Sherifi nga Departamenti për Arsim në ASH.
Ai paralajmëroi se kjo qasje diskriminuese prodhon përmbajtje të pasakta dhe të rrezikshme për formimin e brezave të rinj.
Zbehje e qëllimshme e historisë shqiptare
Sipas ASH-së, krahasuar me programet e mëparshme, përmbajtja që trajton historinë e shqiptarëve është reduktuar ndjeshëm.
“Kjo përbën një tentativë për të relativizuar ekzistencën dhe kontributin e shqiptarëve në historinë e rajonit dhe të Evropës”, tha Sherifi në konferencën për media.
Pasaktësi, kaos dhe deformim i njohurive
Aleanca denoncoi gjithashtu një “kaos strukturor dhe kronologjik” në tekstet e reja, duke theksuar se ngjarjet historike trajtohen në mënyrë fragmentare dhe shpesh me pasaktësi të rënda.
“Kjo dëmton rëndë formimin e nxënësve dhe deformon njohuritë mbi identitetin e tyre,” u shpreh Sherifi.
Kërkohet reagim institucional
ASH e cilësoi qasjen e re si një fyerje ndaj karakterit multietnik të shtetit dhe një formë të institucionalizuar të diskriminimit.
“Programet nuk reflektojnë realitetin multietnik të RMV-së dhe anashkalojnë historinë e njërit prej popujve themelues – shqiptarëve,” përfundoi Sherifi, duke kërkuar reagim urgjent nga institucionet dhe komuniteti ndërkombëtar.