Analisti politik Sefer Selimi ka reaguar lidhur me kandidaturën e Mendi Qyrës për kryetar komune, duke theksuar se ai duhet të largohet nga pozita e kryetarit të Odës Ekonomike të Maqedonisë Veri-Perëndimore (OEMVP), për të ruajtur integritetin institucional të kësaj organizate, transmeton Flaka
“Do të ishte e ndershme dhe institucionale që në momentin e shpalljes së kandidaturës për kryetar komune, z. Mendi Qyra të dorëhiqej nga posti i kryetarit të OEMVP-së,” tha Selimi.
Sipas tij, mbajtja e njëkohshme e funksionit në një organizatë që përfaqëson interesat e bizneseve shqiptare në RMV dhe angazhimi politik në një garë zgjedhore është në kundërshtim me parimet e pavarësisë institucionale dhe dëmton seriozitetin e OEMVP-së.
“Keqpërdorimi i pozitës në OEMVP për qëllime politike jo vetëm që e komprometon pavarësinë e Odës, por rrezikon të përçajë komunitetin e biznesit dhe të përdhos rolin që kjo organizatë ka ndërtuar ndër vite si zë i ekonomisë shqiptare,” shtoi ai.
Selimi thekson se nëse synohet ndërtimi i standardeve të reja në politikë dhe jetën publike, kjo duhet të nisë nga sjellje të ndershme ndaj institucioneve ku veprohet. Flaka