Mijëra njerëz në Spanjën jugore janë evakuuar nga shtëpitë e tyre për shkak të një alarmi të kuq të motit për shi të dendur dhe stuhi. Kjo vjen vetëm dy javë pasi përmbytjet më të mëdha të vendit në dekada morën të paktën 220 jetë dhe shkaktuan dëme të mëdha.
Në provincën e Malagas situata po përkeqësohet orë pas ore. Shërbimet e urgjencës në rajonin, i cili përfshin vendpushimet turistike të Marbella, Velez dhe Estepona, kanë zhvendosur rreth 3,000 njerëz nga shtëpitë me rrezik të lartë përmbytjeje të vendosura pranë lumit Guadalhorce, si edhe shtëpitë e tjera në lagjen Campanillas. Përmbytjet nuk e kanë kursyer as Spitalin Klinik, bën të ditur shërbimi i urgjencës.
Rajoni pritet të goditet më rëndë këtë javë nga fenomeni ekstrem i motit i njohur lokalisht si DANA.
Agjencia meteorologjike spanjolle AEMET vendosi të martën nëntë komunitete në alarme të motit të kuq ose portokalli për stuhi të forta dhe reshje të dendura deri të rrëmbyeshme. Paralajmërimet mbulojnë Katalonjën, Ishujt Balearik dhe pjesë të provincave të Valencias dhe Andaluzisë.
Shkollat, universitetet, parqet publike janë mbyllur dhe aktivitetet sportive janë pezulluar. Shkollat u mbyllën gjithashtu në Valencia dhe në pesë rajone katalanase të Tarragona. Studentët po qëndrojnë në shtëpi edhe në Granada dhe komuna të tjera të provincës.
Alarmi i kuq i agjencisë meteorologjike do të qëndrojë në fuqi të paktën deri në agimin e së enjtes në Malaga, Granada, në veri të Castellon dhe në jug të Tarragona, në anën lindore. Alarmi në provincën e Valencias është rritur gjithashtu në të kuqe, pasi është goditur tashmë nga Dana dy javë më parë. Shkollat do të jenë të mbyllura të enjten dhe duke filluar nga ora gjashtë e së mërkurës pasdite, qarkullimi rrugor është kufizuar.