Izraeli pretendon se ka vrarë Shefin e Shtabit të Houthive në Jemen, Mohammed al-Ghamari – rebelët mohojnë: Tentativa dështoi
Tel Aviv / Sana’a – Ushtria izraelite ka deklaruar se ka vrarë Shefin e Shtabit të forcave Houthi në Jemen, Mohammed al-Ghamari, gjatë një sulmi të përqendruar ajror. Lajmi është bërë publik nga burime zyrtare ushtarake izraelite, të cilat pretendojnë se objektivi u godit me sukses në një operacion të ndërlidhur me përshkallëzimin e tensioneve rajonale.
Nga ana tjetër, rebelët Houthi kanë hedhur poshtë këto pretendime, duke thënë se tentativa për të vrarë al-Ghamarin ka dështuar dhe se ai është gjallë e në detyrë. Sipas mediave pranë lëvizjes Houthi, nuk ka pasur viktima në radhët e komandës së lartë ushtarake.
Derisa asnjë provë e pavarur nuk është publikuar për të konfirmuar njërën nga palët, ngjarja ka ngritur shqetësime për një përshkallëzim të mundshëm të konfliktit në Jemen dhe më gjerë në rajon.