Të enjten u publikua emblema zyrtare për 17 vjetorin e pavarësisë, por shpesh kritikë kanë shfaqur qëndrim të fortë ndaj krijuesve të emblemës, duke aluduar se ajo lidhet ngushtësisht me partinë Lëvizje Vetëvendosje.
Pas sulmeve të shumta në mediat sociale dhe debatit publik, kompania “Red Mill”, që është përgjegjëse për dizajnin e emblemës, ka dalë me një sqarim për të adresuar shqetësimet e ngritura në lidhje me dizajnin e ri. Një hap i tillë ishte i nevojshëm për të qartësuar se emblema ka një rëndësi të veçantë për popullin e Kosovës dhe simbolizon një histori dhe aspirata kombëtare.
“Këtë vit, patëm nderin të krijojmë emblemën zyrtare për 17-vjetorin e Pavarësisë së Kosovës—një simbol që nuk përfaqëson vetëm dizajn, por shpirtin e një kombi. Në shikim të parë, dy forma të guximshme qëndrojnë krah për krah, një jehonë e ndjeshme e numrit 17. Një reflektim i kohës—17 vite pavarësi, festuar më 17 shkurt. Dy shtatëmbëdhjeta, të ndërthurura në kuptim, qëndrojnë si një homazh për rrugëtimin e kaluar dhe atë që ende na pret”, thuhet në njoftim.
Tutje, kanë treguar edhe për format.
“Por shikoni më nga afër, dhe format zbulojnë më shumë. Ato ngrihen si krahë, gati për fluturim, duke mishëruar një vend që gjithmonë synon përpara. Ngjyra e artë pëshpërit triumf, një rrugëtim të shtruar me sukses. E bardha, ngjyra e unitetit, na kujton se së bashku, ne ngrihemi. Çdo vijë është një hap drejt së ardhmes. Çdo kënd, një simbol i progresit. Dhe ashtu si shqiponja që fluturon lart mbi ne, Kosova është gati—për lartësi të reja, horizonte të reja dhe një të ardhme pa kufij. Përqafoni Vizionin. Mirësevini në kapitullin e ardhshëm”.