Qeveria e Kosovës ka miratuar projektbuxhetin për vitin 2025, që kap vlerën prej 3.6 miliardë eurosh. Kryeministri i Kosovës, Albin Kurti, tha se kjo shifër përbën një rritje prej afër 9 për qind krahasuar me buxhetin e vitit paraprak.
Ai tha se gjatë katër vjetëve të qeverisjes së partisë së tij, Kosova buxheti është rritur “vit pas viti si asnjëherë më parë”.
Kurti tha se rritje të buxhetit ka për shumë sektorë, përfshirë atë të pagave, që përfshin rritjen e paralajmëruar të pagave për sektorin publik.
Një ditë më parë, ekzekutivi njoftoi se punëtorët e sektorit publik në janarin e vitit të ardhshëm do të pranojnë paga me 55 euro rritje dhe 55 euro të tjera në korrik të vitit 2025.
Në mbledhjen e Qeverisë të mbajtur më 30 tetor, Kurti tha se përveç pagave, buxheti është rritur edhe për shtesat për fëmijë, 100 milionë euro janë shtuar për të mbuluar rritjen prej 20 për qind të pensioneve, dhe sektorit të shëndetësisë i është shtuar buxheti për blerjen e barnave esenciale.
Ministri i Financave, Hekuran Murati, tha se buxheti është gjithëpërfshirës që reflekton trendin e rritjes ekonomike.
Murati tha se sektorët kryesorë që kanë përfituar rritje të buxhetit janë sektorët e mbrojtjes, sigurisë, shëndetësisë, infrastrukturës rrugore, e të tjera.
Ministri i Financave tha se sivjet Kosova ka pasur rritje të përshpejtuar ekonomike dhe në terma realë, kjo rritje në fund të vitit do të jetë në 4.5 për qind.
Sipas mekanizmave ndërkombëtarë financiarë, rritje ekonomike e Kosovës këtë vit do të arrijë në afër 4 për qind.
Ndërkaq, sa i përket projeksioneve të Qeverisë për rritjen ekonomike për vitin e ardhshëm, Murati tha se në Kosovë rritja ekonomike me terma realë vitin e ardhshëm do të jetë 5.6 për qind.
Sipas ligjeve, Qeveria kishte afat deri në fund të tetorit që të votojë buxhetin për vitin e ardhshëm. Tani, buxheti duhet të shkojë në Kuvend dhe të shqyrtohet e miratohet nga deputetët e Kuvendit të Kosovës, të cilët kanë afat për miratimin e buxhetit deri në fund të vitit.