Sipas Listës Serbe peticioni në ditët në vijim do t’u dorëzohet zyrtarisht përfaqësuesve të vendeve të QUINT-it, misionit të KFOR-it, misionit të EULEX-it, Bashkimit Evropian, OSBE-së dhe UNMIK-ut
Lista Serbe, nëpërmjet një komunikate për media, ka bërë të ditur se ka përfunduar mbledhja e nënshkrimeve për peticionin kundër ndërtimit të dy urave të reja mbi lumin Ibër.
Sipas Listës Serbe për vetëm 11 orë, sa ka zgjatur mbledhja e organizuar e nënshkrimeve, 3 mijë e 628 qytetarë janë shprehur kundër ndërtimit të këtyre urave.
“Ky numër i nënshkrimeve në një kohë kaq të shkurtër përfaqëson një sinjal të fuqishëm dhe të qartë – populli është kundër imponimit dhe politikës së forcës. Lista Serbe i falënderon sinqerisht të gjithë qytetarët që treguan përgjegjësi, unitet dhe gatishmëri për të mbrojtur qytetin e tyre, komunitetin dhe të drejtën për t’u konsultuar rreth vendimeve që prekin jetën e tyre”, thuhet në deklaratën e Listës Serbe.
Sipas Listës Serbe peticioni në ditët në vijim do t’u dorëzohet zyrtarisht përfaqësuesve të vendeve të QUINT-it, misionit të KFOR-it, misionit të EULEX-it, Bashkimit Evropian, OSBE-së dhe UNMIK-ut.
“Populli serb nuk është kundër zhvillimit dhe infrastrukturës, por është kundër vendimeve që merren pa të dhe kundër politikës që ka për qëllim fshirjen e ekzistencës së tij në këto hapësira”, pretendon Lista Serbe.
Qeveria në detyrë e Kosovës ka ndarë një buxhet prej rreth tre milionë eurosh për ndërtimin e dy urave të reja mbi lumin Ibër – një për këmbësorë dhe një për automjete – ndërsa punimet rreth tyre pritet të përfundojnë në sezonin e vjeshtës.