Mbështetës të Vuçiçit me shkopinj përballen me protestuesit në Beograd
Në Beograd, policia ka ndërhyrë për të zmbrapsur qytetarët nga hapësira pranë zyrave të Partisë Progresive Serbe (SNS) në rrugën “Kneza Milosa”, pasi një grup protestuesish dhe përkrahësish të pushtetit kanë filluar të hedhin mjete piroteknike dhe bomba zhurmuese.
Gjatë incidentit është përdorur edhe gaz lotsjellës, sipas raportimeve të mediave serbe.
Më herët gjatë mbrëmjes, disa kordone të xhandarmërisë dhe policisë, të pajisur me mjete për shpërndarjen e protestave, kishin ndarë pjesëmarrësit e protestës – e cila kishte nisur pranë Shtabit të Përgjithshëm – nga përkrahësit e pushtetit.
Sipas raportimeve në mesin e rreth njëqind përkrahësve të pushtetit ishte edhe një grup më i vogël i të rinjve të maskuar.
Edhe në Novi Sad janë shënuar tensione, kur qytetarët janë nisur drejt rrugës “Kosovska”, ku ndodhen zyrat e SNS-së. Në këtë rast, policia ka përdorur gaz lotsjellës për të shpërndarë turmën, ndërsa disa persona të maskuar janë kundërpërgjigjur duke hedhur kapsolla drejt kordonit policor.