Për herë të parë në Maqedoni, ministri Mexhiti promovon helikopterin për transport të pacientëve
Angazhimi i Ministrisë së Shëndetësisë për një medikopter është realizuar, që nga sot është në funksion për pacientët me rrezikshmëri të lartë nga i gjithë vendi.
Bëhet fjalë për një helikopter me pajisje të reja për ndihmë emergjente mjekësore. Medikopteri është i pajisur me pajisje më moderne – monitorë për monitorimin e parametrave vitalë dhe monitorim invaziv, defibrilator, bombola oksigjeni, aspirator, barna dhe instrumente të tjera medicinale.
Në promovimin e sotëm, Ministri i Shëndetësisë, Dr. Fatmir Mexhiti, theksoi se në këtë mënyrë mundësohet mbrojtje më e mirë, si dhe transport më i shpejtë i pacientëve deri te institucionet shëndetësore.
Në varësi të diagnozës së pacientëve që do të transportohen, do të sigurohen edhe pajisje shtesë. Transporti është plotësisht pa pagesë dhe është i ekipuar me mjek dhe infermiere.