Mediat ndërkombëtare kanë ngritur alarmin mbi shqetësimin që ka përfshirë shumë vende të Evropës për mundësinë e tërheqjes së trupave amerikane, pas rikthimit të kontakteve mes Rusisë dhe Shteteve të Bashkuara të Amerikës në Arabinë Saudite.
Në një shkrim të gazetës gjermane Bild, titullohet “Evropa në frikë! Shërbimet sekrete kanë frikë nga tërheqja e trupave amerikane”. Gazeta thekson se shumë politikanë dhe shërbime të sigurisë perëndimore janë të shqetësuar për ndikimin që mund të ketë tërheqja e trupave amerikane nga disa shtete të Evropës, duke përfshirë mundësinë e humbjes së pranisë amerikane në vendet e NATO-s.
Sipas Bild, kërkesa e Putinit për tërheqjen e trupave amerikane nga vendet e NATO-s që iu bashkuan pas vitit 1990 është një nga pikat kryesore të negociatave të zhvilluara në Riad. Shumë ekspertë, përfshirë ish-ministrin lituanez të Punëve të Jashtme, Gabrielius Landsbergis, kanë theksuar se një tërheqje e mundshme mund të çojë në një rrezik të madh për sigurinë e Evropës.
Një skenar i mundshëm që shqetëson shumë analistë është pushtimi i menjëhershëm i ish-republikave sovjetike nga ushtria ruse, duke përfshirë Estoninë, Letoninë dhe Lituaninë, si dhe një luftë të mundshme me Poloninë.
Për më tepër, Financial Times ka analizuar këtë situatë dhe ka theksuar se, nëse trupat e NATO-s tërhiqen nga shtetet e ish-perandorisë sovjetike, kjo mund të lërë Evropën të pambrojtur ndaj një ushtrie ruse, duke i dhënë mundësi Putinit të realizojë qëllimet e tij strategjike.
Shënim: Disa imazhe gjenden nga interneti, që konsiderohen të jenë në domenin publik. Nëse dikush pretendon pronësinë, ne do të citojmë autorin, ose, sipas kërkesës, do të heqim menjëherë imazhin.