Pas 17 vitesh hetimesh, Policia Greke ka arritur të zbulojë një vjedhje të madhe të ndodhur në vitin 2008 në një filial banke në Kifisia, afër Athinës.
Vlera e parave dhe sendeve të vjedhura nga kasaforta e bankës arrin në 4 milionë euro.
Autorët e dyshuar të ngjarjes, dy shtetas të Kosovës, janë shpallur në kërkim.
Ngjarja e vjedhjes ka ndodhur në gusht të vitit 2008, kur persona të panjohur thyen një dritare të bankës dhe hynë brenda për të vjedhur para dhe sende me vlerë.
Hetimet e mëtejshme nga Drejtoria e Hetimeve Kriminale të Policisë Greke kanë çuar në identifikimin e dy shtetasve të Kosovës si autorët e mundshëm të vjedhjes.
Ata janë Basri Berisha, 53 vjeç (alias Basri Ramadani), dhe Sinan Beqiroski, 54 vjeç (alias Sinan Bekjiroski).
Berisha, i cili aktualisht mbahet në një qendër paraburgimi në Francë, është një emër i njohur për autoritetet ndërkombëtare, pasi ka qenë i arrestuar më parë për vepra të ngjashme në Gjermani dhe Kosovë.
Nga analiza krahasuese e të dhënave, është konstatuar se Berisha është i përfshirë gjithashtu në një tentativë vjedhjeje në vitin 2009 në një filial banke në Athinë, si dhe në vjedhjen e një kasaforte dhe bankomati në vitin 2010 në një supermarket në Kretë.
Hetimet vazhdojnë, ndërsa Policia Greke po bashkëpunon me autoritetet ndërkombëtare për arrestimin dhe ekstradimin e të dyshuarve, të cilët përballen me akuza të rënda për vjedhje dhe pastrim parash, raporton NOA.