Në një dokument zyrtar me amendamente kompromisi të miratuara në nivelin e Komitetit për Punë të Jashtme (AFET) të Parlamentit Evropian, Maqedonia e Veriut përshkruhet si shënjestër e qartë e operacioneve të huaja dashakeqe me synim destabilizimin e vendit dhe frenimin e rrugës së saj europiane, shkruan Flaka
Në amendamentin kompromis 8, paragrafët 35a dhe 35b, shprehet shqetësim i thellë për projektin e ashtuquajtur “Bota Serbe”, duke theksuar se disa përfaqësues të qeverisë aktuale në Shkup jo vetëm që nuk janë distancuar nga ky koncept, por e kanë promovuar aktivisht atë. Dokumenti dënon pjesëmarrjen në takime dhe platforma ku tentohet krijimi i një sfere ndikimi rajonal që minon sovranitetin e shteteve dhe rrezikon stabilitetin në Ballkan.
Paralelisht, eurodeputetët theksojnë nevojën për hapjen e arkivave të shërbimeve sekrete jugosllave (UDBA dhe KOS), si në Maqedoni ashtu edhe në Serbi, për të mundësuar përballjen transparente me të kaluarën totalitare dhe për të forcuar demokracinë dhe institucionet në të gjithë rajonin.
Dokumenti bën të ditur se tabloidet dhe mediat serbe nën ndikimin e Kremlinit po instrumentalizojnë narrativa dezinformuese anti-BE në vend, duke përhapur lajme të rreme dhe teori konspirative që ndikojnë në opinionin publik, sidomos për çështje si lufta në Ukrainë apo reformat e brendshme kushtetuese në Shkup.
50% e qytetarëve të Maqedonisë, sipas të dhënave të përmendura në raport, kanë qenë subjekt i ndikimeve të tilla dezinformuese. Po ashtu, Parlamenti Evropian kritikon qeverinë për miratimin e ligjeve me procedura të përshpejtuara, mungesën e transparencës në financimin e partive, si dhe për reklamat qeveritare që keqpërdoren për qëllime politike.
Dokumenti vë në dukje gjithashtu rrezikun e varësisë nga Kina, përmes huasë së fundit të marrë përmes Hungarisë, e cila sipas eurodeputetëve është financuar nga pala kineze. Në këtë kontekst, përmendet edhe roli i Serbisë dhe Hungarisë në avancimin e interesave gjeopolitike të Pekinit dhe Moskës në Ballkanin Perëndimor.
Ky dokument kritik, i cili është miratuar nga Komiteti AFET dhe pritet të shqyrtohet në seancën plenare të korrikut, përkon me paralajmërimet publike të disa liderëve politikë vendas për ndikimin e thelluar serb në institucionet shtetërore të Maqedonisë së Veriut, veçanërisht në fushën e sigurisë dhe politikës së jashtme.