Sot kandidati për president të Maqedonisë së Veriut nga Fronti Europian, Bujar Osmani, vizitoi vendbanimet e Tetovës dhe malësisë së Sharrit, duke nisur nga Bozovci, Veshalla, Brodeci, Shipkovica, Liseci, Gajrja e tj. dhe me banorët e këtyre fshatrave diskutuan për programin e tij si president dhe për udhëkryqin në të cilin gjendet vendi që korrespondon me peshën me rëndësi historike të kandidaturës së tij për president.
Osmani duke potencuar se si kandidat i Frontit Europian gjegjësisht i nëntë partive politike dhe katër komuniteteve, që gjithsej bëjnë diku 47% të popullit në Maqedonisë së Veriut, shqiptar, turq, boshnjak dhe rom, shtoi se kësaj radhe gjasat janë shumë serioze për të kaluar si kandidat shqiptar në raundin e dytë. Duke pas parasysh votat do të shpërndahen në 5 kandidat, secili më vete i fuqishëm, kjo atij i jep epërsi për të dal në raundin e dytë.
“Por, kjo kërkon mobilizim, prandaj nuk kam lënë vendbanim pa kaluar. Dhe porosia më e madhe që mund t’ua dërgojmë, është se, tash më jemi shtet i dy popujve, që garojnë në raund të dytë për president, një maqedonas, një shqiptar. Ky është mesazh historik. Prandaj ju kisha lut që të mobilizoheni, që ta bëjmë ta mundshme thyerjen e kësaj barriere, sepse krijohet eufori, e euforia është si ortek i borës që mbledh përpara. Prandaj ju bëjmë thirrje njerëzve, që të mundemi ta arrijmë këtë fitore historike, të kalojmë në raundin e dytë” – kërkoi mbështetjen e popullit Osmani.
Mes tjerash Osmani ju referua edhe bukurive të këtyre fshatrave duke i krahasuar ato me vendet turistike zvicerane dhe austriake duke shtuar se po të ishim vend i Bashkimit Evropian do të kishte garë për vizitë të kësaj ane. Mes tjerash shtoi “na duhet mbështetja, na duhet bashkimi kësaj radhe që të mundemi t’i realizojmë ato qëllime që i kemi nis, e qëllimet janë të mbara, nijeti është i mirë: për të bërë një jetë më të lehtë, një jetë më të mirë, t’i mbajmë njerëzit këtu, të mos na ikin, ta sjellim Europën këtu e mos të shkojmë ne atje…nëse e realizojmë atë qëllim, sinqerisht mund të them që kjo do të jetë qendër e turizmit malor të Europës.
Osmani në fund falënderoi të gjithë banorët për mbështetjen dhe shtoi se vota e tyre më 24 prill do ta përcaktojnë fatin e zgjedhjeve të 8 majit. “Ju ftoj që të mërkurën të mobilizohemi, të jemi të gjithë bashkë për shkak se ky vendim i të mërkurës e përcakton drejtimin kah do e marrë e ardhmja e popullit tonë, e vendit tonë” dhe nënvizoi se fatkeqësisht po ballafaqohemi edhe me një kërcënim të madh që vjen prej nacionalizmit që është vazhdimisht në rritje dhe se shpreson që ky Front i madh Europian që është ndërtuar, do të bëhet mburoja e fuqishme e atij nacionalizmi dhe do të ndërtojë një urë që çon në Bruksel.