Nxënësit e shkollave fillore “Zhivko Brajkovski” dhe “Petar Zdravkovski Penko” në Butel, të cilëve disa ditë më parë u ishte ndaluar nga kryetari i komunës të festonin Festat e Nëntorit në mjediset e shkollës, sonte u pritën si mysafirë të veçantë në ceremoninë zyrtare të Ambasadës së Shqipërisë në Shkup.
Me një gjest simbolik dhe thellësisht domethënës, ambasadori i Shqipërisë, Denion Meidani, i vendosi vogëlushët në radhën e parë të të ftuarve, duke u dhënë hapësirën dhe nderin që u ishte mohuar në shkollat e tyre. Ky veprim u vlerësua lart nga të gjithë të pranishmit, të cilët i përshëndetën fëmijët me ngrohtësi dhe respekt.
Vetëm pak ditë pasi një vendim i padrejtë i mohoi atyre të drejtën për të shënuar Ditën e Flamurit, pritja e Ambasadës së Shqipërisë u shndërrua në një mesazh të qartë institucional: tradita, identiteti dhe gjuha nuk ndalen – por nderohen, mbrohen dhe vendosen në krye.
Gesti i ambasadorit Meidani u cilësua si shembull që forcon ndjenjën e dinjitetit dhe përkatësisë te shqiptarët në Maqedoninë e Veriut, sidomos tek fëmijët që përjetuan ndalimin e festës.