Një ditë pas sulmeve të gjera ajrore të Izraelit ndaj objektivave qeveritare dhe ushtarake në Siri, kryeministri izraelit Benjamin Netanyahu deklaroi se vendi i tij do të vazhdojë të përdorë forcën ushtarake për të mbrojtur dy “vija të kuqe” që ka vendosur në territorin sirian.
benjamin netanyahu
Në një mesazh të regjistruar me video, Netanyahu theksoi:
“Kemi përcaktuar një politikë të qartë: çmilitarizimi i zonës në jug të Damaskut, nga Lartësitë Golan deri te malet e komunitetit druzi, është një nga vijat tona të kuqe. Tjetra është mbrojtja e vëllezërve tanë druzë në Jebel el-Druz.”
Kreu i qeverisë izraelite akuzoi drejtpërdrejt regjimin e presidentit sirian Ahmad al-Saraa për shkeljen e të dyja këtyre vijave të kuqe.
“Dërguan forca ushtarake në jug të Damaskut, në një zonë që duhet të jetë e çmilitarizuar, dhe nisën masakrat ndaj komunitetit druzi. Kjo ishte e papranueshme për ne në çdo mënyrë,” deklaroi Netanyahu.
Ai shtoi se armëpushimi i shpallur nga al-Saraa, i cili përfshinte tërheqjen e trupave siriane, nuk ishte rezultat i ndonjë negociate apo lutjeje.
“Armëpushimi u arrit me forcë. Jo me kërkesa, jo me thirrje – me forcë,” tha ai me tone të ashpra.
Në përmbyllje, Netanyahu u shpreh se Izraeli do të vazhdojë të ndërmarrë veprime ushtarake sa herë që e konsideron të nevojshme, duke dërguar një mesazh të qartë jo vetëm për regjimin sirian, por edhe për rajonin më gjerë:
“Siguria në kufijtë tanë dhe mbrojtja e komunitetit druzi janë përparësi absolute për qeverinë izraelite.