Kryeministri izraelit, Benjamin Netanyahu të dielën përsëriti thirrjet për çmontimin e plotë të të gjithë infrastrukturës bërthamore të Iranit, ndërsa Uashingtoni dhe Teherani po zhvillojnë bisedime për një marrëveshje bërthamore.
Shtetet e Bashkuara dhe Irani kanë mbajtur deri më tani tre raunde bisedimesh indirekte, të ndërmjetësuara nga Omani, me qëllim arritjen e një marrëveshjeje që do të pengonte Teheranin të merrte armë bërthamore, por edhe do të hiqte sanksionet ekonomike të vendosura nga Uashingtoni.
Netanyahu tha se e vetmja “marrëveshje e mirë” do të ishte ajo që shkatërronte “të gjithë infrastrukturën”, e ngjashme me marrëveshjen e vitit 2003 që Libia nënshkroi me Perëndimin, në të cilën ajo hoqi dorë nga programet e saj bërthamore, kimike, biologjike dhe raketave balistike.
Zyrtarët izraelitë kanë deklaruar prej kohësh se do ta pengojnë Teheranin të marrë armë bërthamore, një deklaratë që Netanyahu e përsëriti.
Izraeli nuk e ka përjashtuar mundësinë e një sulmi ndaj objekteve bërthamore të Iranit në muajt e ardhshëm, pavarësisht se Presidenti Donald Trump i tha Netanyahut se Shtetet e Bashkuara nuk janë aktualisht të përgatitura për të mbështetur një operacion të tillë, sipas një raporti të Reuters më 19 prill, duke cituar një zyrtar izraelit dhe dy burime të tjera me njohuri për këtë çështje.
Netanyahu, duke folur të dielën vonë mbrëma në Jerusalem, tha se i kishte thënë Trump se çdo marrëveshje bërthamore me Iranin duhet gjithashtu të parandalojë Teheranin nga zhvillimi i raketave balistike.