Në mesnatë skadon afati për mbikëqyrjen e Listës zgjedhore si dhe për regjistrimin e votuesve në diasporë. Qytetarët që sot mund të kontrollojnë të dhënat e tyre dhe nëse është e nevojshme të kërkojnë ndryshimin, regjistrimin ose fshirjen nga Lista zgjedhore për zgjedhjet e ardhshme presidenciale dhe parlamentare.
Nga Komisioni Shtetëror i Zgjedhjeve (KSHZ) apelojnë që qytetarët të bëjnë mbikëqyrje dhe nëse ka nevojë të kërkojnë ndryshim.
Sipas të dhënave të KSHZ-së, deri më 14 mars, në drejtoritë rajonale dhe zyrat e Komisionit, mbikëqyrje në të dhënat në Listën zgjedhore kanë bërë 4859 persona. Shtatë persona kanë paraqitur kërkesë për ndryshimin e të dhënave të tyre, 19 persona kanë paraqitur kërkesë për regjistrimin e të dhënave të tyre dhe pesë persona kanë paraqitur kërkesë për fshirje të të dhënave në Listën zgjedhore.
Përmes rrugës elektronike deri më 14.03 2024, rreth 22122 qytetarë i kanë kontrolluar të dhënat e tyre. Janë dorëzuar 25 kërkesa për ndryshime të të dhënave, gjashtë kërkesa për fshirje të të dhënave dhe 10 kërkesa për regjistrim të të dhënave në Listën zgjedhore.
Sa i përket kërkesave të pranuara për regjistrim të votuesve në diasporë, mbrëmë deri në orën 20 kanë arritur 2049 kërkesa, prej të cilave 1430 janë pranuar, 165 janë refuzuar dhe 434 nuk janë proceduar.
Votimi në diasporë për zgjedhjet presidenciale do të organizohet, me intencë se presidenti i vendit zgjidhet sipas sistemit mazhoritar në të gjithë territorin e vendit, si dhe në të gjitha kontinentet ku jetojnë qytetarët tanë, por që të organizohen zgjedhje parlamentare për votim, është e nevojshme të paktën 5355 zgjedhës të jenë të regjistruar në të 52 përfaqësitë konsullore apo zyrat diplomatike jashtë vendit.
Për hapjen e një qendre të votimit në Përfaqësitë diplomatike konsullore apo Zyrës konsullore jashtë vendit, duhet të regjistrohen së paku dhjetë votues.
Të gjithë të regjistruarit në listën zgjedhore do të mund të votojnë si në zgjedhjet presidenciale ashtu edhe në ato parlamentare, ndërsa të drejtë votë mund të ushtrojnë edhe qytetarët me dokumente personale dhe dokumente udhëtimi të skaduara në nëntë muajt e fundit para zgjedhjeve.
Me ndryshimet dhe plotësimet e fundit në Kodin zgjedhor, parashikohet që në Listën zgjedhore të regjistrohen të gjithë qytetarët që kanë mbushur moshën 18 vjeç deri në ditën e zgjedhjeve, në përputhje me aktin për shpalljen e zgjedhjeve, të cilët kanë vendbanim në territorin e shtetit.
Zëdhënësja e KSHZ-së, Lupka Guguçevska tha se kjo do të thotë se në certifikatat e Listës zgjedhore për zgjedhjet parlamentare më 8 maj do të regjistrohen të gjithë qytetarët që kanë mbushur, përkatësisht do të mbushin 18 vjet deri më 8 maj të vitit 2024 si ditë të caktuar për zgjedhjet parlamentare. Ndërsa për zgjedhjet presidenciale, në certifikatat e Listës zgjedhore do të regjistrohen qytetarët të cilët kanë mbushur, përkatësisht do të mbushin 18 vjet deri më 24 prill si datë e mbajtjes së zgjedhjeve presidenciale.
“Sipas ndryshimeve të fundit në Kodin zgjedhor, parashikohet që për zgjedhjet që do të mbahen këtë vit, votuesit do të mund të votojnë me letërnjoftim ose dokument udhëtimi vlefshmëria e së cilës ka skaduar në afatin prej nëntë muajsh deri në ditën e mbajtjes së zgjedhjeve. Nëse marrim harkun kohor, kjo do të thotë që në zgjedhjet presidenciale të 24 prillit, qytetarët, gjegjësisht votuesit, mund të identifikohen me dokumente personale të vlefshme, por edhe me dokumente personale, letërnjoftim ose dokument udhëtimi të cilave u ka skaduar vlefshmëria duke filluar nga 24 korrik 2023 viti për zgjedhjet presidenciale, ndërsa për zgjedhjet parlamentare do të mund të identifikohen votuesit me dokumente personale të vlefshme, ose dokumente personale – letërnjoftim ose dokument udhëtimi që ka skaduar për çfarëdo arsye në periudhën nga 8 gushti 2023 deri më 8 maj 2024”, sqaroi Guguçevska në konferencën për shtyp javën e kaluar.