Autorët qëlluan mbi efektivët gjatë ndjekjes – Policia u kundërpërgjigj me zjarr
Një ndjekje e armatosur ndodhi rreth orës 01:00 të mëngjesit të sotëm në autostradën Tiranë-Durrës, pranë vendit të njohur si “Çifligu” në Sukth.
Policia konstatoi një automjet të vjedhur, që ishte përdorur një natë më parë në grabitjen me dhunë të një karburanti në Sukth.
Gjatë ndjekjes me shpejtësi drejt Tiranës, automjeti doli nga rruga pranë rrethrrotullimit të mbikalimit në Vorë.
Nga mjeti u hap zjarr në drejtim të Policisë, e cila u kundërpërgjigj në kushtet e vetëmbrojtjes.
Si pasojë, u plagos një nga autorët, shtetasi A. D., 28 vjeç, banues në Bilalas, Shijak, i cili ndodhet jashtë rrezikut për jetën në Spitalin e Traumës në Tiranë.
Personi tjetër, L. Ç., 27 vjeç, gjithashtu nga Bilalasi, u kap në flagrancë pas rezistencës me armë ndaj efektivëve.
Në vendngjarje u sekuestrua një armë automatike me dy krehra. Në operacion morën pjesë edhe forcat mbështetëse të Policisë së Tiranës.
Policia po vijon hetimet për të dokumentuar plotësisht veprimtarinë kriminale të dy të ndaluarve.