Këshilltari i Qytetit të Shkupit, Naim Bajrami, ka reaguar publikisht për herë të parë lidhur me statusin e tij politik, duke sqaruar se veprimi i tij si këshilltar i pavarur nuk përbën as distancim dhe as devijim nga politikat e Aleancës për Shqiptarët.
Në reagimin e tij, Bajrami thekson se ndjeu obligim politik të sqarojë qëndrimin e tij pasi çështja u hap publikisht, duke nënvizuar se aktualisht vepron si këshilltar i pavarur në Këshillin e Qytetit të Shkupit, në përputhje të plotë me politikat dhe vendimet politike të Aleanca për Shqiptarët.
Ai kujton se edhe deputetë të ASH-së në Kuvend tashmë veprojnë si të pavarur, duke mbrojtur, sipas tij, vijën autentike politike dhe programore të partisë. Sipas Bajramit, veprimi i tij nuk është individual apo i izoluar, por pjesë e një qëndrimi të qartë dhe të vazhdueshëm politik.
“Pavarësia formale nuk nënkupton distancim nga parimet, por është mjet për t’i mbrojtur ato pa kompromise dhe pa deformime politike”, thekson Bajrami, duke shtuar se vendimi i tij lidhet drejtpërdrejt me respektimin e vendimeve partiake dhe interesit real që përfaqëson ASH.
Në fund, ai garanton se në Këshillin e Qytetit do të vazhdojë të veprojë me përgjegjësi dhe integritet, në shërbim të interesit publik dhe në mbrojtje të vlerave politike për të cilat ka marrë besimin e qytetarëve.