Asnjë nga kandidatët e propozuar nga Lëvizja Vetëvendosje nuk arrin të sigurojë 61 votat e nevojshme për t’u zgjedhur në postin e kryetarit të Kuvendit të Kosovës.
Në vazhdimin e seancës konstituive paraditen e së dieles, kandidatët e propozuar nga Lëvizja Vetëvenodjse për kryetar/e të Kuvendit të Kosovës – Hekuran Murati, Arbërie Nagavci dhe Dimal Basha – nuk arritën të sigurojnë votat për t’u zgjedhur në këtë post.
Lëvizja Vetëvendosje propozoi sërish deputetin kosovar, Hekuran Murati, për postin e kryetarit të Kuvendit të Kosovës. Por, për herë të dytë brenda javës, ai nuk arriti të merrte 61 votat e nevojshme. Murati mori 55 vota pro, 46 kundër dhe 5 abstenime.
E pas dështimit të kandidaturës së Muratit, subjekti me më së shumti mandate në Kuvendin e Kosovës propozoi deputeten kosovare, Arbërie Nagavci, e cila, gjithashtu, nuk mori 61 votat e nevojshme. Ajo mori 55 vota pro, 47 kundër dhe 4 abstenime.
Lëvizja Vetëvendosje e provoi në fund edhe deputetin kosovar, Dimal Basha, i cili, megjithëse nuk arriti të sigurojë votat e nevojshme për t’u zgjedhur në këtë post, kundër tij votuan vetëm 25 deputetë. Basha mori 57 vota pro dhe 24 abstenime.