Hekuran Murati ministër në detyrë i Financave njëherit edhe deputet i Lëvizjes Vetëvendosje(VV), ka kritikuar Lidhjen Demokratike të Kosovës (LDK) pas refuzimit të mundësisë për bashkëqeverisje, duke thënë se ky veprim është kundër dëshirës së elektoratit të saj.
Murati duke folur gjatë para mediave pas dështimit për herën e 12 të seancës konstituive të Kuvendit është pyetur për arsyen e kërkesës së Lëvizjes Vetëvendosje për një koalicion me LDK-në, parti të cilën ai e akuzoi se nuk merr vendime të pavarura, por është nën ndikimin e grupeve të fuqishme ekonomike.
Murati theksoi se ftesa për koalicion ishte bazuar në vullnetin e votuesve të tyre dhe se Lëvizja Vetëvendosje ka ofruar bashkëpunim për një qeveri stabile.
“Qëllimi i ftesës ka qenë që t’u ofrojmë qytetarëve një bashkëpunim dhe qeveri stabile, ashtu siç ka pas deklarim nominal nga vetë kryesia e LDK-së, por ne e pamë nga përgjigja e tyre që është e pamundur, edhe kur ofrohet bashkëpunim i tillë, që ata të marrin vendimet vetë”, tha Murati.
Ai shtoi se pas refuzimit të kësaj ftesë, LDK-ja ka vendosur të shkojë kundër dëshirës së elektoratit të saj, pasi, sipas tij, refuzimi tregon pamundësinë e partisë për të marrë vendime të pavarura.