Pasi BDI e thirri kryeministrin që ta mbajë fjalën e tij për zgjedhje të parakohshme parlamentare, Hristijan Mickoski filloi ta analizojë gjendjen brenda partisë opozitare. Për thirrjet e BDI-së që të shkohet në zgjedhje, kryeministri tha se i kupton se pse s’kanë durim.
“I kuptoj politikanët e opozitës që s’kanë durim, të cilët mendojnë se me zgjedhje të parakohshme do t’i zgjedhin problemet që kanë të bëjnë me keqpërdorime të mëdha të bëra në të kaluarën”, tha Hristijan Mickoski, kryeministër.
Kundër zgjedhjeve të parakohshme janë të gjithë partnerët e qeverisë. Marrëdhëniet brenda koalicionit i komentoi edhe kryeparlamentari Afrim Gashi nga radhët e VLEN. Sipas tij, marrëdhëniet mes partive në pushtet janë korrekte dhe të qëndrueshme, ndërsa këtë e konfirmon edhe fakti që shumica në Kuvend numëron 78 deputetë. Pyetjes nëse pushteti pret sulme të reja nga BDI me afrimin e zgjedhjeve lokale, Gashi u përgjigj:
“Ne nuk duhet të merremi me opozitën. Ne duhet të merremi me punën tonë, të sjellim ligje cilësore, të sjellim investime të huaja, t’i rrisim pagat dhe pensionet…”, deklaroi Afrim Gashi, kryetar i Kuvendit.
Idenë për zgjedhje të parakohshme bashkë me ato lokalet vitin e ardhshëm e përmendi kryeministri në seancë për pyetje deputetësh, por pastaj partnerët nga VLEN vlerësuan se deklarata e Mickoskit është nxjerrë jashtë kontekstit. Pushteti është kundër zgjedhjeve të parakohshme dhe prej atje thonë se kjo do të ishte shpenzim shtesë për shtet.
Por nga ana tjetër, nga BDI thonë se shpenzimi do të ishte më i ulët nëse organizohen zgjedhje të dyfishta në një ditë.
Nga LSDM theksuan se janë të gatshëm për zgjedhje kurdo qoftë të mbahen. Kryetari i partisë Venko Filipçe vlerësoi se ideja për zgjedhje të reja ishte flirt i Mickoskit me BDI-në dhe është mesazh për VLEN dhe ZNAM, për të cilat thotë se kanë përkrahje të përgjysmuar dhe rol të margjinalizuar në pushtet.