Mediat më prestigjioze evropiane kanë raportuar gjerësisht për vdekjen e këngëtarit të njohur shqiptar, Shpat Kasapi, i cili ndërroi jetë dje në Itali pas një ataku kardiak, në moshën 40-vjeçare.
Gazeta e njohur gjermane Bild i ka kushtuar një artikull të veçantë artistit shqiptar, duke rikujtuar krijimtarinë e tij dhe hitet që e shoqëruan publikun për më shumë se dy dekada. Në fund të shkrimit, Bild ka shprehur ngushëllimet për humbjen e madhe të artit shqiptar.
Edhe media zvicerane Blick ka raportuar për vdekjen e Kasapit, me titullin dramatik: “Superylli shqiptar Shpat Kasapi (40) ka vdekur.” Në artikull theksohet karriera e tij e gjatë dhe ndikimi i pakontestueshëm në popkulturën shqiptare.
Mediat italiane, po ashtu, i kushtuan hapësirë lajmit, duke e përshkruar Kasapin si një nga këngëtarët më të njohur dhe më të dashur të skenës muzikore shqiptare.
Vdekja e Shpat Kasapit ka shkaktuar reagime të shumta dhe pikëllim të thellë në publikun shqiptar dhe atë ndërkombëtar, duke lënë pas një trashëgimi të rëndësishme artistike. (INA)