Maqedonia e Veriut sërish merr hua, ndërsa kredinë e fundit do ta marrë kompania shtetërore “NOMAGAS AD Skopje”, për të cilën shteti është i obliguar të lëshojë garanci.
“Nomagas” do të marrë një kredi në vlerën 98.600.000 euro për financimin e Projektit të Gazifikimit Rajonal dhe Banka Europiane për Rindërtim dhe Zhvillim (BERZH) kushtëzon miratimin e kredisë me dhënien e garancisë nga shteti, përcjell INA.
“Maqedonia garanton shlyerjen e obligimeve dhe përmbushjen e dispozitave të Marrëveshjes për hua, e cila do të lidhet ndërmjet NOMAGAS AD Shkup dhe BERZH në vlerë prej 98.600.000 euro, brenda afateve dhe kushteve të përcaktuara në Marrëveshjen e huasë, nëse NOMAGAS SHA Shkup nuk i përmbush dhe nuk i kryen obligimet nga Marrëveshja për kredinë”, shkruhet në propozimin e ligjit të dorëzuar në Kuvend.
Kredia jepet në dy këste, kësti i parë është 66,344,000 euro, ndërsa kësti i dytë është 32,256,000 euro. Afati për shlyerjen e dy kësteve të kredisë është 15 vjet, duke përfshirë një periudhë mospagimi prej tre vjetësh.
Dy këstet e kredisë do të shlyhen me 24 këste gjashtëmujore në datat 10 qershor dhe 10 dhjetor të çdo viti.
Propozuesit, Ministria e Financave, kërkojnë që ligji të miratohet pas një procedure të shkurtuar. Norma e interesit është e ndryshueshme dhe përbëhet nga EURIBOR gjashtëmujore e rritur me një marzh prej 1 për qind. (INA)