Fatmir Limani ka reaguar pas zgjedhjeve të 19 tetorit me një reflektim të gjatë për gjendjen politike dhe shoqërore në Kërçovë, duke theksuar se qyteti i tij nuk mund të ndërtohet me retorikë boshe dhe ndarje etnike, por me vlera të mirëfillta njerëzore dhe zhvillim të qëndrueshëm.
“Sapuni nuk është djathë dhe nuk mund të hahet, por sot në politikë po na shitet sapuni për djathë,” shkruan Limani, duke iu referuar degradimit të vlerave dhe manipulimeve që, sipas tij, kanë penguar zhvillimin real të Kërçovës.
Ai shton se Kërçova nuk bëhet duke harruar bashkëjetesën mes etnive, pa kushte në shkolla, çerdhe e spitale, apo duke u fshehur pas flamujve dhe sloganeve boshe.
Sipas Limanit, qyteti mund të zhvillohet vetëm përmes investimeve kapitale, respektimit të ligjit dhe përzgjedhjes së njerëzve të ndershëm e profesionistë në drejtim.
“Kërçova do të bëhet vetëm me durim, urtësi, transparencë dhe besnikëri të palëkundur. Vetëm kështu mund ta kthejmë në qendër rajonale dhe tërheqëse për të rinjtë që po largohen çdo ditë,” shkruan ndër të tjera Fatmir Limani.