Liderët e koalicionit VLEN do të mblidhen sot në orën 14:00 për të diskutuar vendimin e Aleancës për Shqiptarët, e udhëhequr nga Arben Taravari, për të garuar me lista të veçanta në zgjedhjet e ardhshme lokale. Takimi do të mbahet pa praninë e Taravarit.
Zëvendëskryeministri i parë i Maqedonisë së Veriut, Izet Mexhiti, e bëri të ditur këtë takim gjatë një aktiviteti ekologjik në Orizare të Likovës.
Ky zhvillim vjen pas vendimit të Aleancës për Shqiptarët për të dalë me lista të veçanta për këshilltarë komunalë në zgjedhjet lokale, ndërsa janë të hapur për bashkëpunim me partitë e tjera për kandidatët për kryetarë komunash.
Koalicioni VLEN përbëhet nga Lidhja Demokratike, Alternativa, Lëvizja BESA, Aleanca për Shqiptarët dhe Lëvizja Vetëvendosje.
Takimi i sotëm pritet të jetë vendimtar për të ardhmen e bashkëpunimit brenda koalicionit dhe për strategjinë e përbashkët në zgjedhjet lokale.