Në Kuvendin e Kosovës ka filluar shqyrtimi i parë i Projektligjit për Buxhetin e Kosovës për vitin 2025.
Kryeministri i vendit, Albin Kurti ka thënë para deputetëve se buxheti për vitin 2025 është rritur për rreth 9% më i lartë se viti i kaluar.
“Kam nderin të bëhem kryeministri i parë që prezanton buxhetin e katërt për ta shënuar kështu edhe qeverinë e parë që e çon mandatin deri në fund. Buxheti për vitin është projektuar të jetë 3.6 miliardë euro. 9% më i lartë se i vitit 2024”, tha ai.
Ai theksoi se gjatë qeverisjes së tij bruto produkti vendor është rritur aq sa për herë të parë sa që sivjet do ta kalojë shifren prej 10 miliardë eurove. Kurse për vitin e ardhshëm pritet të shkojë përtej 11 miliardë euro.
“Karakteristikat tjera të buxhetit të vitit 2025 janë: Buxheti për paga dhe shtesa 13.85 për qind më i lartë, se në vitin 2024, ose 111.5 milionë euro; Buxheti për mallra dhe shërbime duke përfshirë edhe shërbimet komunale, është 3.2 për qind më i lartë se në vitin 2024; Buxheti për subvencione dhe transfere është 8.75 për qind më i lartë se në vitin 2024, e këtu luajnë rol masat e reja si pensionet, shtesat për fëmijë, rimëkëmbja ekonomike etj.; Buxheti për investime kapitale është 8.3 për qind më i lartë se në vitin 2024; Për këto vite të qeverisjes bruto produkti vendor është rritur aq sa për herë të parë sa që sivjet do ta kalojë shifren prej 10 miliardë eurove. Kurse për vitin e ardhshëm pritet të shkojë përtej 11 miliardë euro”, deklaroi ai.