Shkup, 2 qershor 2025 – Bashkimi Demokratik për Integrim (BDI) ka reaguar ashpër ndaj ndërtimit të mbi 150 ndërtesave pa leje në Komunën e Çairit, duke e cilësuar këtë si një “krim urban” që përbën rrezik të drejtpërdrejtë për jetën e qytetarëve dhe si një instrument politik për shantazh ndaj partnerëve të koalicionit qeveritar nga radhët e VLEN-it.
Sipas kumtesës së BDI-së, objektet e ndërtuara pa leje dhe pa asnjë standard statik apo sizmik janë ndërtuar nën mbrojtjen e strukturave politike të afërta me VMRO-DPMNE-në, me qëllim përfitimesh politike dhe kontrolli ndaj liderëve të VLEN-it.
“VMRO-DPMNE i krijoi dhe i zgjodhi drejtuesit e VLEN-it sepse janë të shantazhueshëm dhe të kontrollueshëm përmes dosjeve të hapura në Prokurorinë e kapur nga pushteti,” thuhet në reagimin e BDI-së.
Partia akuzon se ky veprim është pjesë e një axhende më të gjerë antieuropiane dhe antishqiptare të Qeverisë, e cila përmes një “farse përfaqësimi” po zëvendëson zërin real të shqiptarëve me individë të frikësuar nga ndjekja penale.
“Shqiptarët nuk do ta pranojnë kurrë këtë farsë përfaqësimi, ku zëri i tyre zëvendësohet me njerëz të përulur nga frika,” thuhet më tej në kumtesë.
Sipas BDI-së, këto veprime cenojnë barazinë ndëretnike dhe tentojnë të zhbëjnë Marrëveshjen e Ohrit, duke e larguar vendin nga rruga drejt integrimit në Bashkimin Evropian.
Partia kërkon hetim të plotë dhe ndëshkim të përgjegjësve institucionalë dhe politikë, duke theksuar se pa ndërtimin e shtetit ligjor, nuk mund të ketë stabilitet dhe zhvillim të qëndrueshëm.