Ministrja e Kulturës Bisera Kostadinovska-Stojçevska ka hedhur poshtë, siç tha, “gënjeshtrat e sajuara dhe pretendimet skandaloze të kryetares Danela Arsovska se ka ditur për zjarrin në sallën Universale dhe nuk e ka raportuar”. Ajo paralajmëroi padi kundër Arsovskës, transmeton Portalb.mk.
“Ajo vetë do të shpjegojë hollësisht në pretendimet e saj për mua. Ajo duket se po ia del mirë me proceset gjyqësore. Nëse do të jetë prokuror dhe hetues, le të urdhërojë. Do të shihemi në gjykatë për shpifje. Ajo jo vetëm që tregoi mospërfillje ndaj qytetit dhe mungesë dëgjimi, por tregoi se e vetmja mënyrë për t’u marrë me të është përmes gjykatës”, tha Kostadinovska-Stojçevska në konferencën e sotme për media.
Ministrja e Kulturës nuk ka dashur të komentojë shkaqet e zjarrit. Ajo ka thënë se hetimet janë në vazhdim dhe se hetimet do të duhet të tregojnë se si ka rënë zjarri në sallën Universale.
“Salla Universale është e siguruar dhe do t’u kthehet qytetarëve. Nuk është pronë personale e Danela Arsovskës”, tha ministrja.
Arsovska dje në një konferencë për media tha se edhe pse janë pronarë të objektit, nuk janë informuar për fillimin e aktiviteteve ndërtimore në sallën e koncerteve. Pas pretendimeve të autoriteteve se godina është e siguruar dhe dëmi do të mbulohet, Arsovska kërkon përgjigje se ku, kur dhe nga kush është siguruar projekti dhe me çfarë vlere.
Arsovska po ashtu tha se është e paqartë pse ministrja e Kulturës, nëse e ka marrë vesh zjarrin para orës 9, nuk e ka raportuar dhe pse punëtorët dhe inxhinieri i ndërmarrjes janë përpjekur ta shuajnë zjarrin dhe pasi nuk e kanë lokalizuar, nuk e kanë lajmëruar dhe nuk kanë kërkuar ndihmë nga njësia e zjarrfikësve të Qytetit të Shkupit, ku zjarri është raportuar shumë më vonë nga një kalimtar i rastit.
“Lajmi për zjarrin u përhap aq shpejt sa që në një kohë shumë të shkurtër u vërshuan rrjetet sociale, prej nga e mora vesh dhe pikërisht në atë moment shkova nga ky vend pune, nga Ministria e Kulturës, në sallën Universale“, u përgjigj Kostadinovska-Stojçevska.
Kujtojmë se dje Prokuroria Themelore Publike Shkup filloi hetimin për zjarrin në sallën Universale në Shkup
Zjarri kaploi Sallën Universale në Shkup më 9 prill. Kupola që u vendos pikërisht dy javët paraprake u dogj. Nuk ka viktima apo të lënduar.