Në kampin ushtarak Bondsteel në Kosovë kanë mbërritur sot rreth 70 automjete ushtarake dhe personel mbështetës që do të stërviten me KFOR-in
Në kampin ushtarak Bondsteel në Kosovë kanë mbërritur sot rreth 70 automjete ushtarake dhe personel mbështetës, duke përmbyllur procesin e dislokimit të përkohshëm të forcave rezervë të KFOR-it.
Kontingjenti britanik, i përbërë nga mbi 350 trupa të “Scots Guards”, do të zhvillojë ushtrime stërvitore në bashkëpunim me pjesëtarë të KFOR-it. Sipas njoftimit të NATO-s, ky aktivitet është pjesë e ciklit të rregullt të trajnimeve, që kanë për qëllim rritjen e gatishmërisë operacionale dhe forcimin e kapaciteteve për t’iu përgjigjur çdo zhvillimi të situatës së sigurisë në Kosovë.
Stërvitjet do të zhvillohen në përputhje me mandatin e KFOR-it, i cili synon garantimin e një ambienti të qetë e të sigurt për të gjitha komunitetet, si dhe lirinë e lëvizjes, në koordinim me Policinë e Kosovës dhe misionin EULEX.
Pas përfundimit të angazhimit, trupat britanike të “Scots Guards” do të kthehen në bazën e tyre në Mbretërinë e Bashkuar.