Kompania norvegjeze e karburanteve Haltbakk Bunkers ka njoftuar se do të ndërpresë furnizimin me karburant për forcat ushtarake amerikane në Norvegji dhe anijet amerikane që ankorohen në portet norvegjeze, duke përmendur pakënaqësinë me politikën e fundit të SHBA-së ndaj Ukrainës.
Në një deklaratë, kompania kritikoi takimin e fundit të Donald Trumpit me Volodymyr Zelenskyn.
Haltbakk Bunkers lavdëroi Zelenskyn për përmbajtjen e tij, duke akuzuar SHBA-në për “shfaqjen e një shfaqje televizive të tillë”.
Si rezultat, kompania deklaroi: “Ne kemi vendosur që menjëherë të ndalojmë ofrimin e karburanteve për forcat amerikane në Norvegji dhe anijet e tyre që ankorohen në portet norvegjeze. Asnjë karburant për amerikanët”.
Bëhet e ditur se Haltbakk Bunkers u bëri thirrje gjithashtu norvegjezëve dhe evropianëve që të ndjekin këtë shembull, duke përfunduar deklaratën me sloganin “Rroftë Ukraina”, shkruajnë mediat e huaja.
Kush është Haltbakk Bunkers?
Haltbakk Bunkers është një furnizues norvegjez i karburantit që ofron karburant detar për transportin dhe operacionet ushtarake.
Me bazë në Kristiansund, Norvegji, kompania është e specializuar në shërbimet e bunkerimit për anijet që operojnë në ujërat norvegjeze, duke ofruar logjistikë dhe shpërndarje karburanti për klientët civilë dhe ushtarakë.
Raportohet se kompania luan një rol të rëndësishëm në industrinë detare të Norvegjisë, duke furnizuar me karburant anijet që shkojnë në portet norvegjeze, duke përfshirë ato të NATO-s dhe forcave aleate.
Por vendimi për të ndërprerë furnizimet për ushtrinë amerikane mund të ketë implikime logjistike për operacionet detare amerikane në rajon.
Norvegjia është një anëtar kyç i NATO-s dhe shpesh pret forcat e SHBA-së dhe aleatëve për stërvitje të përbashkëta dhe operacione të mbrojtjes në Arktik.
Andaj ky njoftim ngre pyetje në lidhje me qëndrimin më të gjerë evropian ndaj politikës së SHBA-së ndaj Ukrainës dhe nëse bizneset apo qeveritë e tjera mund të ndërmarrin veprime të ngjashme.
Ai gjithashtu thekson se si kompanitë private në Evropë po reagojnë në mënyrë të pavarur ndaj zhvillimeve gjeopolitike.
Ndryshe, SHBA ende nuk i është përgjigjur vendimit dhe mbetet për t’u parë se si kjo do të ndikojë. /Telegrafi/