Ministrja e Arsimit dhe Shkencës, Vesna Janevska është vënë në shënjestër të sulmeve dhe kritikave, pasi të premten, gjatë një aktiviteti të realizuar në cilësinë e ministres, ajo përdori emrin e ri kushtetues të shtetit. Përkatësisht, pasi fillimisht përdori vetëm termin Maqedoni, ajo u përsërit duke thënë emrin e plotë të shtetit, duke përfshirë edhe prapashtesën e Veriut.
Kjo ka mjaftuar që, profile të rreme në platformën X, e të cilat kryesisht publikojnë përmbajtje nacionaliste, të fillojnë sulmet ndaj ministres, e madje kanë përdorur edhe fjalë fyese ndaj saj. Disa prej tyre, kanë kërkuar që ministrja të kërkojë falje dhe të japë dorëheqje.
“Unë nuk kam mirëkuptim për sakrificën tënde për anëtarësim në BE, të kërkosh falje që ke thënë Republika e Maqedonisë. Ose kërkim-falje për këtë performancë fyese ose dorëheqje!”
“Një përçmim i këtillë i votuesve të VMRO-DPMNE-së, nuk është parë”.
“Si nuk ju vjen turp. Kërko falje edhe një herë dhe thuaj Maqedoni”.
Nga ana tjetër, profesori universitar i të drejtës ndërkombëtare, Toni Deskoki, ka arysetur ministren, duke thënë se, si anëtare e kabinetit Qeveritar, ajo është e obliguar që të respektojë Kushtetutën, e rrjedhimisht edhe emrin kushtetues të vendit.
“Ajo si ministre në Qeveri është e obliguar që të respektojë Kushtetutës, ndërsa sipas Kushtetutës shteti ynë u riemërua Republika e Maqedonisë së Veriut. Gjithë ne që ishim kundër ndryshimit të emrit neveritemi nga krimi i bërë. Historia do t’i dënojë gjithë ata që e realizuan këtë. Por, realiteti është se, kemi emër të ri dhe funksionarët shtetëror janë të obliguar që ta përdorin. Shteti, por edhe ne si qytetarë të tij, nuk kemi asnjë dobi me atë që funksionarët shtetëror do të shkelnin [Marrëveshjen e] Prespës”, tha Toni Deskoski.
Kujtojmë se, VMRO – DPMNE ishte kundër ndryshimit të emrit të vendit, për çka edhe kanë zhvilluar protesta si dhe, nuk i kanë votuar ndryshimet kushtetuese, me të cilat u bë ndryshimi i emrit. Lideri i VMRO-DPMNE madje në disa raste, u premtoi votuesve se do të shfuqizojë Marrëveshjen e Prespës. Por retorika e partisë ndryshoi me ardhjen e tyre në pushtet./tvklan/