Berat Jakupi, nënkryetar i ASH së Ziadin Selës ka reaguar pas deklaratave të Taravarit në intervistën e mbrëmshme në Ora24.
Jakupi i cili është nga Gostivari ka shkruar:
“Deklaratat e fundit të Arben Taravarit dhe postimet e tij në Facebook për mua janë, paradoksale dhe të neveritshme.
Të dëgjosh sot si përpiqet të ngrejë zërin për të drejtat e shqiptarëve, vetëm pasi është përjashtuar nga qeveria, është qesharake. Sepse kur ishte pjesë e pushtetit, jo vetëm që heshti, por u bë bashkëpunëtor në padrejtësitë ndaj shqiptarëve.
Akoma më hipokrite janë deklaratat e tij kundër hakmarrjes politike. Dua t’i rikujtoj Taravarit se ai vetë ka ushtruar hakmarrje politike në mënyrën më të ulët të mundshme – ndaj meje personalisht – vetëm sepse vendosa të vazhdoj rrugën me Ziadin Selën. Hakmarrja e tij shkoi përtej çdo limiti njerëzor dhe moral.
Pastaj ka kurajën të thotë: “Unë kurrë nuk kam thënë asnjë fjalë të keqe për Ziadin Selën.
Në fakt, Arben, nuk është e nevojshme të thuash asgjë – sepse veprimet e tua flasin vetë. Dhe ndonjëherë, më mirë thuaj një fjalë të keqe, sesa të bësh atë që ke bërë”, përfundon Jakupi.
Jakupi: Dua t’i rikujtoj Taravarit se ai vetë ka ushtruar hakmarrje politike ndaj meje personalisht
