Jahi Bakiji ka kritikuar partitë e “Vlenit” për kontradiktat e tyre lidhur me Ligjin për Përdorimin e Gjuhëve, duke theksuar se ata herë e pranojnë e herë e refuzojnë këtë ligj. Sipas Bakijit, ky ligj ishte baza për harmonizimin e ligjeve të tjera për përdorimin e gjuhës shqipe dhe ishte një prej kushteve kryesore të Aleancës për Shqiptarët gjatë qeverisjes së vitit 2017, për të garantuar që ai të miratohej brenda 100 ditëve të para.
Bakiji ka theksuar se, pa këtë ligj, debati për mbajtjen e provimeve në gjuhën shqipe nuk do të kishte zhvillim. Ai gjithashtu i ka ftuar deputetët që të përdorin numrat që kanë në parlament për të hequr termin “20%” dhe për të propozuar ndryshime dhe plotësime të Ligjit për Përdorimin e Gjuhëve, apo edhe të krijojnë një ligj të ri për përdorimin e gjuhës shqipe, ashtu siç ekziston Ligji për Përdorimin e Gjuhës Maqedonase.
