Zëvendëskryeministri i parë dhe ministri i Mjedisit Jetësor dhe Planifikimit Hapësinor, Izet Mexhiti, ka qenë i pranishëm në hapjen solemne të hotelit “Ëmbla” në Strugë – një projekt i ideuar dhe realizuar nga Mendi Qyra, i cili njihet gjithashtu si kandidat i pavarur për Strugën në zgjedhjet e ardhshme lokale.
Ky veprim ka ngjallur jo pak diskutime në qarqet politike lokale, duke u parë nga disa si një sinjal i heshtur mbështetjeje ndaj Qyrës, pavarësisht pozicionimit të tij jashtë strukturave të mëdha partiake.
Gjatë fjalës së tij, Mexhiti lavdëroi investimin, duke e cilësuar si një shembull të ndërthurjes së traditës strugane me modernitetin dhe si një vlerë të shtuar për qytetin. Ai vlerësoi vizionin e Qyrës për krijimin e vendeve të reja të punës dhe zhvillimin ekonomik lokal, duke e përshkruar hotelin “Ëmbla” si një projekt të ndërtuar “me dashuri për qytetin”.
Përtej komplimenteve, prania e Mexhitit pranë një kandidati të pavarur në prag të zgjedhjeve lokale që do të mbahen në tetor, ngre pikëpyetje nëse kjo vizitë ishte thjesht mbështetje për një investim lokal – apo një sinjal politik për ndonjë aleancë të mundshme në të ardhmen.
Në çdo rast, “Ëmbla” tashmë është pjesë e panoramës urbane të Strugës – ndërsa qyteti hyn ngadalë në fazën parazgjedhore, ku çdo detaj merr rëndësi të dyfishtë.