Elfete Ismaili kritikon kandidaten për Komisionin kundër Diskriminimit për deklarata mbi Konventën e Stambollit
Ish-zëvendësministrja e Mbrojtjes, Elfete Ismaili, ka reaguar publikisht lidhur me intervistën e Xhihan Ahmed, e propozuar për anëtare të Komisionit për Parandalim dhe Mbrojtje nga Diskriminimi, duke ngritur dyshime serioze mbi profesionalizmin, kompetencën dhe politizimin e këtij institucioni të pavarur.
Sipas Ismailit, gjatë intervistës publike, Ahmed ka folur për Stambollin dhe periudhën e Ataturkut, çka sipas saj nuk ka lidhje me natyrën, mandatin dhe përgjegjësitë e institucionit që pretendon të udhëheqë. Ajo thekson se veprimtaria e Komisionit ka të bëjë drejtpërdrejt me Konventën e Stambollit, dhe jo me interpretime historike apo politike.
Në këtë kontekst, Ismaili rikujton se Konventa e Stambollit është një dokument themelor i Këshillit të Evropës në luftën kundër dhunës me bazë gjinore dhe dhunës në familje, i cili vendos standarde të qarta ligjore dhe institucionale për mbrojtjen e viktimave dhe ndëshkimin e autorëve të dhunës.
Ajo thekson se zbatimi i Konventës obligon institucionet shtetërore të ndërmarrin politika gjithëpërfshirëse, të forcojnë kuadrin ligjor dhe të sigurojnë shërbime mbështetëse për viktimat, duke promovuar barazinë reale ndërmjet grave dhe burrave si vlerë themelore demokratike.
Sipas Ismailit, dhuna me bazë gjinore trajtohet nga Konventa si shkelje e të drejtave të njeriut dhe riafirmon përgjegjësinë e shtetit për garantimin e sigurisë, dinjitetit dhe jetës së çdo qytetari. Ajo përfundon se angazhimi institucional për zbatimin e saj mbetet tregues i qartë i vullnetit politik për një shoqëri më të drejtë, më të sigurt dhe më të barabartë.