Deputetja Ilire Dauti ka reaguar ashpër ndaj hipokrizisë së disa aktorëve politikë të VLEN-it, të cilët po shfaqin “shqetësim të vonuar” për përhapjen e lojërave të fatit. Ajo kujton se në fund të vitit të kaluar, opozita kishte në dorë edhe ligjin, edhe butonin e votës, për të miratuar propozimin e Alternativës që lojërat e fatit të lejoheshin vetëm në hotele me pesë yje.
“As nuk e mbështetët ligjin, as nuk shtypët butonin e votës,” – shkruan Dauti, duke ironizuar me moralistët që, sipas saj, po përdorin temën për tallje publike, jo për zgjidhje reale.
Ajo shton se jo çdo shqetësim lind nga ndërgjegjja – disa vijnë nga frika, disa nga humbja, e disa nga pafytyrësia.
“Ne jemi aty përsëri. Urdhëroni, jo për tallje, por për zgjidhje,” – përfundon mesazhin Dauti, duke lënë të kuptohet se është e gatshme ta rikthejë iniciativën, nëse ka vullnet real për veprim.
Në fund, ajo sugjeron se nëse duhet, është gati të publikojë edhe mënyrën se si është votuar ligji nga deputetët – një sinjal i qartë për transparencë dhe mbajtje përgjegjësie.