Kërkohet më shumë përgjegjësi nga banorët që jetojnë përreth çerdhes që ata jo të dëmtojnë por të kujdesen më shumë për pamjen dhe imazhin e kësaj çerdhe
Urim HASIPI
Tetovë, 8 shkurt – Një shishe me alkool e hedhur nga persona të panjohur përfundoi në hapësirat e Çerdhes në lagjen Potok. Krahas dëmeve materiale nuk janë shkaktuar dëme të tjera, por si fenomen ka tmerruar edukatoret dhe stafin e kësaj çerdhe. Incidentet e këtilla kanë qenë më të shpeshta në të kaluarën, kur grupe huliganësh demolonin këtë çerdhe. Por, me rrethojat që janë vendosur dhe kamerat e sigurisë rastet e huliganizmit ishin rralluar. Tejet e shqetësuar është edhe përgjegjësja e kësaj çerdhe e cila thotë se rastet e këtilla nuk duhet të ndodhin në objektet ku edukohen fëmijët, ndërsa kërkon nga njerëzit që janë jashtë të kenë sjellje më të mirë dhe të mos demolojnë këta objekte. “Në të kaluarën rastet kanë qenë më të shpeshtë, por viteve të fundit, ngase drejtoria e çerdhes ka marrë hapa konkrete duke e rregulluar oborrin por edhe duke vendosur rrethoja të reja për të pamundësuar hyrjen nga jashtë të personave të papërgjegjshëm. Kamera kemi, por nga pjesa e pasme nuk kemi kamera dhe duhet që të vendosen kamera shtesë sepse edhe mbeturinat hidhen këtu në oborr”, tha Shemije Meta përgjegjëse e çerdhes.