Gazetari dhe analisti shqiptar Mentor Nazarko, në një intervistë për agjencinë e lajmeve MIA, vlerëson se Maqedonia e Veriut ende përballet me vështirësi serioze në ndërtimin e një versioni të konsoliduar të historisë. Sipas tij, këto vështirësi burojnë si nga presionet e brendshme për formimin e kombit, ashtu edhe nga ndikimet e vazhdueshme të fqinjëve.
Nazarko kujton se vendi ka kaluar nëpër narrativa të ndryshme historike – nga periudha e Mbretërisë Jugosllave, te Jugosllavia e Titos, e deri në fazën e pavarësisë – ku lidershipi shpesh ka ofruar versione kontradiktore e konfuzuese të historisë.
Ai thekson se frika se pavarësia mund të vihej në rrezik nga shqiptarët ka nxitur një qasje etnocentrike në shkrimin e historisë, ku shpesh është përjashtuar ose relativizuar roli i tyre. Vetëm kohët e fundit, sipas tij, është pranuar me mirënjohje bashkëpunimi i çetave shqiptare me maqedonasit në periudhën e Perandorisë Osmane. Megjithatë, Nazarko vëren se ende nuk pranohet publikisht origjina shqiptare e banorëve të Gornë Rekës, ndonëse ajo përfaqëson një kapital të gjallë gjuhësor e folklorik.
“Shqiptarët ortodoksë mund të jenë dhe duhet të jenë një urë e re pajtimi mes maqedonasve dhe shqiptarëve,” – tha ai.
Nazarko paralajmëron se përpjekjet për të zhbërë arritjet e Marrëveshjes së Ohrit, përfshirë përdorimin korrekt të gjuhës shqipe dhe respektimin e parimit të Badinterit, përbëjnë hapa pas dhe rrezik për destabilitet.
Duke folur për marrëdhëniet mes dy vendeve, ai nënvizon se Shqipëria dhe shqiptarët kanë çdo arsye të ndërtojnë raporte të mira fqinjësore me Maqedoninë e Veriut, çka mbështetet fuqimisht edhe nga partnerët perëndimorë. Sipas tij, projekti i Korridorit Tetë e kthen Adriatikun në një “det të përbashkët”, duke hapur mundësi të reja bashkëpunimi.