Kryetari i Aleancës për Ardhmërinë e Kosovës, Ramush Haradinaj tha se kryeministri në detyrë, Albin Kurti duhet “të lëshojë rrugë” nëse nuk i ka 61 vota për të zgjedhur kryetarin e Kuvendit dhe qeverinë
Haradinaj u deklarua para hyrjes kryesore të Kuvendit, pak para vazhdimit të seancës konstituive – përpjekja e 41-të për ta bërë Kuvendin.
“E keqja e Kosovës është Kurti… Kurti duke i bërë 61 vota me zgjedh kryetar kuvendi me qeveri, nëse nuk i ka le të lëshon rrugë. Pra kështu është situata, mund t’i japim sa të duam emra por po shihet që ai e ka ndarë mendjen me bo keq e ma keq për Kosovën”, u shpreh ai.
Para Kuvendit po protestojnë pjesëtarë të shoqërisë civile me pankartat “Cirku i Republikës së Kosovës”, “Loja juaj, pasojat tona”, “Mos folni për zgjedhje, kur s’ofroni zgjidhje!”.
Para hyrjes kryesore të kuvendit po proteston edhe avokati Arianit Kocit, ku para këtij institucioni ka çuar katër gomarë.
Deputetët e Kuvendit të Kosovës janë mbledhur sërish sot, më 3 korrik, në përpjekje për konstituimin e legjislaturës së nëntë. Ky është tentimi i 41-të që prej pesëmbëdhjetë prillit kur ka nisur seanca konstituive.
Vazhdimi i seancës të enjten vjen një ditë pasi presidentja e vendit, Vjosa Osmani, zhvilloi takime të ndara me krerët e partive parlamentare shqiptare, në përpjekje për të zgjidhur krizën institucionale.
Presidentja takoi të mërkurën në kabinetin e saj, kryeministrin në detyrë dhe kryetarin e Lëvizjes Vetëvendosje, Albin Kurti, kreun e Partisë Demokratike të Kosovës, Memli Krasniqi, kryetarin e Lidhjes Demokratike të Kosovës, Lumir Abdixhiku si dhe kreun e Aleancës për Ardhmërinë e Kosovës, Ramush Haradinaj.
Osmani bëri thirrje që të arrihet “sa më shpejt” pajtueshmëri për konstituimin e Kuvendit.
Kosova ka mbajtur zgjedhjet parlamentare më 9 shkurt por ende nuk është bërë konstituimi i Kuvendit.
Deri më tash janë bërë 40 përpjekje, të pasuksesshme.
Procesi ka ngecur të zgjedhja e kryetarit të Kuvendit për çka Lëvizja Vetëvendosje, në koalicion me Guxo dhe Alternativa, nuk po arrin t’i sigurojë 61 votat e nevojshme për ta zgjedhur Albulena Haxhiun.
Partitë që deri më tash ishin në opozitë e kundërshtojnë emrin e Haxhiut si të papranueshëm për këtë pozitë.