Në një reagim të ashpër dhe emocional, Ramush Haradinaj i është përgjigjur kryeministrit Albin Kurti pas akuzave se ai është “me Listën Serbe”. Haradinaj tha se këto fjalë janë të rënda, të padrejta dhe identike me propagandën e Serbisë.
“T’i thuash dikujt që ka dy vëllezër në tokë, dikujt që ka bërë Ushtrinë e Kosovës, se është me Listën Serbe… mos! Dy vëllezër në tokë i kam, dhe kam qenë i pranishëm kur të dy u vranë,” deklaroi ai.
Ai vazhdoi me tone edhe më të forta, duke përmendur sakrificat dhe proceset gjyqësore që ka kaluar:
“T’i thuash dikujt që ka bërë 4 vjet burg në Hagë, 8 vjet procese gjyqësore… dikujt që nga dita e parë nuk e ka lëshuar armën nga dora. Nuk dua t’i përmend familjarët e tjerë, nuk dua t’i hap ato plagë.”
Haradinaj akuzoi Kurtin se po përdor narrativat e Serbisë, duke listuar veprimet e tij politike kundër Beogradit:
“T’i thuash dikujt që e ka vendosur taksën 100% Serbisë… dikujt që i ka përzënë nga veriu ata që na kërcënuan. E këta dalin në syret sa herë që vjen një dron, e ti më thua mua se jam me Listën Serbe? Po kush je ti me i thanë këto fjalë? Kush je ti që po flet me gjuhën e tyre?”
Ai shtoi se akuzat ndaj tij nuk janë rastësi:
“Këto janë të gjitha propagandat që m’i bën Serbia. Pse po flet me gjuhën e tyre?”
Reagimi i Haradinajt ka ndezur debat të fortë politik dhe emocional në opinionin publik, duke rikthyer tensionet mes tij dhe kryeministrit Kurti.
copy_F3E87DE0-2966-4BAD-9CEA-912D83559395