Nga përfundimi i seancës së djeshme të KSHZ-së, ku u hodhën poshtë të gjitha 57 ankesat e paraqitura për raundin e parë të zgjedhjeve lokale, me të marrë vendimet e Komisionit, rrjedh afati ligjor prej 24 orësh që palët e pakënaqura nga këto vendime të kërkojnë të drejtën e tyre në shkallë të dytë përmes padive në Gjykatën Administrative.
Kryetari i KSHZ-së Boris Kondarko, theksoi se të gjitha ankesat janë shqyrtuar brenda afatit ligjor, dhe presin nëse ndonjë nga ankuesit do të fitojnë të drejtën për të shqyrtuar rivotimin në ndonjërën nga 11 komunat.
“Do të jenë të përgatitura vendimet e KSHZ-së për vendimet që u morën për ankesat, në afatin e parashikuar ligjorë, pas pranimit të të njëjtave, parashtruesit kanë të drejtë të kërkojnë drejtësi në shkallë të dytë, me padi në Gjykatën Administrative. Pasi të vendos gjykata, ne për të gjitha këto komuna ku kishte ankesa, në seancë publike, pas disa ditësh varësisht nga procedurat gjyqësore do të dalim me paraqitjen përfundimtare të rezultateve”, tha Boris Kondarko.
Nga 44 komunat për të cilat KSHZ-ja shpalli rezultatet fillestare zyrtare të zgjedhjeve për kryetar komune të hënën, ankesat mund të ndryshojnë situatën për 11, pasi që rezultatet atje ende nuk janë përfundimtare dhe do të jenë pas vendimit të Gjykatës Administrative, si në: Haraçinë, Bogdancë, Bosilovë, Butel, Veles, Gazi Babë, Krivogashtan, Prilep, Resnjë, Çairi dhe Çashkë.
Komisioni Shtetëror i Zgjedhjeve dje hodhi poshtë të gjitha 57 ankesat e paraqitura për raundin e parë të zgjedhjeve lokale. 37 prej tyre kishin të bëjnë me procedurën e përcaktimit dhe përmbledhjes së rezultateve të votimit, dhe 20 ankesa ishin për vetë procedurën e votimit.
“Në seancë publike i sqaroi të gjitha ankesat, kishte gjithsej 37 ankesa për rezultatet e votimit. Dhe më parë, sipas pikës së mëparshme 6, 20 ankesa për procedurën e votimit. Gjithsej 57 ankesa, disa prej të cilave përfshinin më shumë vendvotime. Të gjitha ankesat u hodhën poshtë sot si të pabazuara, pra disa u tërhoqën nga palët parashtruese, dhe disa u hodhën poshtë si të papranueshme”, tha Boris Kondarko.
Sipas KSHZ-së, kjo nënkupton se në 33 komuna, zgjedhjet lokale janë mbyllur që në raundin e parë, për kryetarë dhe për këshilltarë, të cilët do të certifikohen me mandate sipas afatit ligjor. Prej 80 komunave aq sa kemi në total, në raundin e dytë më 2 nëntor do të votohet në 36 komunat e mbetura në balotazh dhe në Qytetin e Shkupit./TV21/