Dy nxënës të shkollës së mesme janë sulmuar fizikisht në Tetovë nga tifozët e “Vojvodës” maqedonas. Rasti ka nxitur reagime të forta, mes tyre edhe nga ish ministri i Drejtësisë, Krenar Lloga.
“Kjo që ndodh nuk mund të bëhet normalitet në Maqedoni. Dhuna fizike dhe verbale kundër shqiptarëve po instalohet nga shkallët e stadiumeve në rrugë e sheshe. Fryma e qeverisë dhe pandëshkueshmëria e këtyre ndodhive është akoma më e rrezikshme se vetë dhuna”, tha Lloga.
Ai shtoi se si prind ndjen ankthin e çdo familjeje që sheh fëmijët e vet të ekspozuar ndaj dhunës, ndërsa si qytetar refuzon ta pranojë një realitet të tillë. Si politikan, Lloga kërkoi reagim urgjent nga institucionet, ndëshkim të autorëve dhe garanci për sigurinë e qytetarëve.
“Nuk duhet të heshtim, sepse heshtja është bashkëfajësi. Maqedonia e Veriut duhet të jetë vend i barazisë, sigurisë dhe respektit të ndërsjellë, jo terren i frikës dhe urrejtjes”, përfundoi ai.