Fokus: Tenderë mbi 6 milionë euro, lidhje familjare mes Kasamit, Azizit dhe kompanive përfituese
Javorja “Fokus” ka publikuar hulumtimin e radhës në të cilin ka zbuluar lidhjet e afërta të kompanive të ndërtimit me kreun e Tetovës, Bilall Kasami dhe deputetin Adnan Azizi. “Lugina e Ujqve e kreut të Tetovës” është titulluar hulumtimi në të cilin fokus kanë qenë Komuna e Tetovës dhe ajo e Zhelinës dhe tenderët e fituar nga kompanitë e afërta me vlerë mbi 6 milionë euro.
Kompania e parë që është favorizuar sipas tyre nga pushteti lokal i Lëvizjes Besa, përkatësisht nga Komuna e Zhelinës është “Murana Kompani” me pronarë Rakip Alii, daja i kreut të Tetovës, Kasami. Për ta thjeshtësuar Alii është pronarë i makinës me të cilën Kasami u paraqit në takimin e fundit të liderëve. “Fokus” pretendon se tenderët e marrë nga “Murana Kompani” i janë besuar këtij subjekti për shkak të lidhjes familjare me kreun e partisë, Bilall Kasami. Kjo kompani ka fituar tenderë edhe në Komunën e Likovës. Në disa projekte për të mos u paraqitur drejtpërdrejtë si kompani, ka qenë nënkontrakto e kompanisë “Bibaj Kompani” nga Tetova.
“Murana Kompani” është partnere e ngushtë e kompanisë “Mujo Ba”, brend që lidhë edhe tre kompani të tjera: “Eko-Peu”, Ereu-Trans” dhe Eko-Enerxhi”. “Mujo-Ba” është kompani në pronësi të Muharrem Mujo Bajramit, “Ereu-Trans” në emër të bashkëshortes së tij Xharije Bajrami ndërsa “Eko-Peu” në emër të vëllait të tij Hazir Bajrami.
Kompanitë e njerëzve që rezultojnë të afërt me Kasamin, Azizin por edhe ministrin e Ekonomisë, Besar Durmishi në dy mandatet e kreut të Tetovës kanë përfituar nga ndërtimi i bulevardeve, rrugëve, trotuareve dhe projekteve tjera infrastrukturore në Tetovë mbi 6 milion euro. Ajo që mbetet dilemë që ngre pikëpyetje juridike është hapja e procedurave tenderuese ku kompanive nuk i është kërkuar përvojë ndërtimore, por vetëm numri i të punësuarve, licenca dhe rezervat e asfaltit në dispozicion. Komuna e Tetovës deri sot nuk është prononcuar për këto dilema. / Alsat.mk