Shkup – Deklarata e kryetarit të Lëvizjes Besa, Bilall Kasami, para liderit të VMRO-DPMNE-së, Hristijan Mickoski, ka ndezur debat në opinion. Kasami tha se në disa raste ka “rënë pre e BDI-së” dhe se është dukur “si nacionalist”.
Ky justifikim i Kasamit u raportua nga mediat, përfshirë edhe Tv Shenja, që publikoi videon nga ngjarja.
Megjithatë, reagimi i fortë ka ardhur nga Bujar Bajrami, i cili e sheh nacionalizmin jo si problem, por si vlerë.
“Ç’të keqe ka të jesh nacionalist? Të duash kombin tënd, të ruash vlerat e asaj që je dhe që i përket, të mbrosh identitetin tënd kur të tjerët ta cënojnë, nuk është diçka e keqe, por është hyjnore. Pse kaq frikë, pse kaq nënshtrim, pse kaq distancim nga identiteti kombëtar vetëm se ‘padroni’ ju quan nacionalist?”, shkruan Bajrami.
Ai shton se nacionalizmi nuk rrezikon askënd, por është mbrojtje e natyrshme e kombit:
“Të jesh nacionalist nuk rrezikon askënd, thjeshtë mbron me fanatizëm atë që të përket ty. Nacionalizmi është vlerë, nuk është naivitet e prapambeturi. Marrëdhëniet ndëretnike nuk kultivohen duke hequr dorë nga identiteti kombëtar, por duke e dashur dhe respektuar tënden, e duke respektuar edhe të tjerët.”
Në përfundim, Bajrami akuzon politikanët shqiptarë se me këtë qasje po tentojnë “t’i zhveshin shqiptarët nga ndjenja e nacionalizmit” dhe t’i shndërrojnë në “mall shitjeje për hesapet e enklavave sllave”.