Në një intervistë të dhënë për mediat gjermane në kuadër të verës politike, kancelari i Gjermanisë, Friedrich Merz, ka shprehur pakënaqësinë e tij të thellë ndaj mënyrës se si po vepron qeveria izraelite në Rripin e Gazës.
“Mua nuk po më pëlqen më prej shumë javësh ajo që po bën qeveria izraelite në Gaza,” deklaroi Merz, duke theksuar se këtë qëndrim e ka ndarë drejtpërdrejt me kryeministrin izraelit në dy takime të fundit dhe në bisedat telefonike mes tyre.
Ai e quajti situatën aktuale në Gaza “të papranueshme” dhe bëri thirrje për një zgjidhje afatgjatë, të drejtë dhe të qëndrueshme.
“Shpresoj që ne, evropianët së bashku me amerikanët, të mund të gjejmë një zgjidhje që në fund garanton zbatimin e parimit të dy shteteve. Palestinezët e kanë këtë të drejtë – të kenë një hapësirë ku mund të jetojnë,” theksoi kancelari gjerman.
Deklarata e Merz vjen në një moment të tensionuar ndërkombëtar, ku veprimet e Izraelit në Gaza kanë ngjallur reagime të ashpra në mbarë botën, përfshirë edhe nga aleatë të ngushtë perëndimorë.
Kjo deklaratë e hapur e një lideri të një prej vendeve më të fuqishme të Bashkimit Evropian pritet të ketë ndikim si në opinionin ndërkombëtar, ashtu edhe në presionin diplomatik ndaj Izraelit për të rishikuar qasjen e tij ndaj popullsisë palestineze dhe konfliktit në përgjithësi.