Miliarderi Elon Musk ka braktisur planet për të krijuar një parti të tretë politike në SHBA, duke vendosur të përqendrojë mbështetjen e tij financiare dhe politike tek zëvendëspresidenti republikan JD Vance, i cili shihet si një nga kandidatët potencialë për zgjedhjet presidenciale të vitit 2028.
Sipas raportimeve të The Ëall Street Journal, Musk, i cili për muaj me radhë kishte shqyrtuar mundësinë e lançimit të një partie të re të quajtur “America Party”, ka zgjedhur të mos rrezikojë marrëdhëniet me Vance dhe me krahun republikan, pas tensioneve të vazhdueshme me presidentin Donald Trump.
Në mbështetje të Vance janë rreshtuar edhe emra të tjerë të njohur nga bota e teknologjisë, mes tyre Peter Thiel, David Sacks, Anthony Wood dhe Palmer Luckey. Sondazhet e fundit e rendisin senatorin nga Ohio ndër favoritët për nominimin republikan.
Musk kishte shpallur publikisht krijimin e “America Party” më 4 korrik, pas një sondazhi online ku mbi 65% e ndjekësve të tij e mbështetën idenë. Megjithatë, përgatitjet konkrete për regjistrimin e partisë dhe organizimin e strukturave nuk nisën kurrë, duke bërë që projekti të shuhet para kohe.
Raportet e Musk me Donald Trump kanë qenë të luhatshme. Pas një kontributi prej 300 milionë dollarësh për fushatën e tij në vitin 2024, marrëdhëniet mes të dyve u tensionuan, por më pas presidenti ka theksuar se dëshiron që kompanitë e Musk, si SpaceX dhe Neuralink, të vazhdojnë të “lulëzojnë”, duke tërhequr kërcënimet për ndërprerjen e kontratave qeveritare.
Me tërheqjen nga projekti i partisë së re, Musk duket se po zgjedh të investojë brenda kornizës tradicionale të Partisë Republikane, duke përdorur ndikimin e tij financiar për të mbështetur figura që ndajnë vizionin e tij politik për Shtetet e Bashkuara.
HUAZUAR NGA REDAKSIA VOX