Edhe pse tanimë është e qartë se anëtarësimi i vendit në BE mvaret vetëm nga ndryshimet kushtetuese, Qeveria aktuale vazhdon të shpresojë në rrugë alternative e të pasigurta. Pas VMRO-së dhe kryeministrit Mickoski, tanimë edhe partnerët e VLEN dhe ministri për eurointegrime, Orhan Murtezani i kanë kthyer sytë kah Orbani dhe shpresat për hapjen e bisedimeve me Bashkimin Europian i kanë varur te Hungaria e cila morri kryesimin me BE.
“E përshëndes miratimin e Agjendës Strategjike 2024-2029 me prioritet zgjerimin e BE-së, (Preparing for a bigger and stronger Union). Kjo e kthen agjendën e zgjerimit të BE-së ndër prioritete kryesore, njëherësh paraqet edhe shansë për ne të lëvizim më shpejt drejt integrimit të vendit në BE. Shpresë shtesë japin edhe pritshmërite optimistike të Hungarisë, në relacion me zgjerimin”, deklaroi Murtezani.
Ai këto komente i bëri pas takimit me ambasadorin e BE-së, Davit Geer, ndërsa vijnë në një kohë kur të gjithë diplomatët ndërkombëtarë, Brukseli dhe Uashingtoni, bëjnë me dije se Marreveshja me Greqinë dhe ajo me Bullgarinë nuk mund të negociohen përsëri dhe se implementimi i të njëjtave është kusht për hapjen e bisedimeve.